Profesori universitar, Avdi Smajljaj, ka kritikuar reagimin e ministrit të Punëve të Brendshme, Xhelal Svecla, i cili ka mbrojtur reagimin e Policisë së Kosovës që një ditë më parë ka arrestuar në mënyrë të dhunshme invalidin e UÇK-së, Faik Fazliu.

Në profilin e tij në “Facebook”, Smajljaj ka shkruar se ministri nuk ka të drejtë të komandoj ekzekutimin e veprimeve policore, as në substancë e as në shpejtësi.

Sipas tij, ministria ka për mandat bërjen e politikave, jo komandimin e policisë.

Postimi i plotë i Avdi Smajljaj:

Askush mbi ligjin përfshin edhe ndërhyrjen joligjore të ministrit të MPB-së në veprimet operacionale të policisë duke u dhënë instruksione se si duhet të veprojnë ata, me çfarë shpejtësie në cilat raste duhet të kryhen operacionet.

Ministri nuk ka të drejtë të komandoj ekzekutimin e veprimeve policore, as në substancë as në shpejtësi.

Ministria ka për mandat bërjen e politikave, jo komandimin e policisë.

Gjithashtu, policia ka obligimet e veta në operacionet e tyre, ndër të tjera për të respektuar të drejtat, dinjitetin dhe integritetin e çdo qytetari.