![](https://www.epokaere.com/wp-content/uploads/2023/09/sneijder.jpg)
Sneijder: Interi e meritonte Ligën e Kampionëve
Wesley Sneijder ishte një nga arkitektët e tripletës historike të Interit në vitin 2010, protagonist i një ecurie të shkëlqyer në Ligën e Kampionëve. Dhe sot holandezi, në faqet e “Gazzetta dello Sport”, ka thënë fjalën e tij për skuadrën e Simone Inzaghit:
“Nuk kisha asnjë dyshim për triumfin në derbin ndaj Milanit. Mos harroni se kjo është skuadra që vuri në vështirësi një gjigant si Manchester City, madje e meritoi ta fitonte Ligën e Kampionëve vetëm pak muaj më parë. Ajo finale e Stambollit duhet të jetë një burim krenarie për të gjithë dhe jo keqardhje. Që nga ajo mbrëmje Interi ka edhe më shumë besim te vetja, ‘zikaltrit’ e dinë se falë lojës së tyre mund të mposhtin çdo rival”, ka thene Sneijder.
“Nuk jam i befasuar, sepse Interi kishte një strukturë solide. Pjesa tjetër është falë një trajneri shumë të mirë dhe të përgatitur si Simone Inzaghi. Është e vërtetë se lojtarët që bënë historinë e klubit zikaltër janë larguar, por drejtuesit kanë zgjedhur me kujdes në merkato. Interi ka gjetur një ekuilibër të mirë midis senatorëve dhe të rinjve”, ka shtuar Sneijder.