Kryetari i Odës së Hotelerisë dhe Turizmit, Hysen Sogojeva, ka treguar se ka filluar anulimi i dasmave nga kontaktet që ka pasur me pronarët e restoranteve, pas vendimit të Qeverisë.

Ai ka deklaruar se do ta respektojnë këtë vendim të qeveris, por nuk do të pranojnë asnjëherë mbyllje totale.

“Fillimisht jemi dakorduar që dasmat të mbahen me një numër të kufizuar, por që dyfishimi i rasteve na ka vendosur para një akti të kryer dhe që kur pamë raste kaq shumë, atëherë me vendimin e ministrit në parim u pajtuam, pasi mbi të gjitha është shëndeti. Qysh tani ju them që mbylljet totale nuk i lejojmë, dhe sugjeroj që le të marrin masa sa të duan por mbylljen totale nuk e lejojmë”, ka thënë Sogojeva për “EO”.

Sogojeva ka theksuar që dëmet janë të mëdha pas anulimit të dasmave, por që e kanë pasur me patjetër pranimin e këtyre masave.

“E vërtetë që na ka dëmtuar mjaftë shumë, por kur marrim parasysh një numër kaq të madh të rasteve duhet të pajtohemi edhe me këtë situatë. Në bazë kontaktve që kemi ka filluar anulimi i dasmave”, ka deklaruar ai.

Sipas tij, gati 80% e dasmave kanë përfunduar, por që pjesa tjetër e mbetur do të shkaktojë humbje të mëdha.

“Pjesa më e madhe është bërë e dasmave, ku 80% d tyre janë përfunduar. Por prapë ka mbetur ky 20% që ka mbetur ka humbje me mijëra euro dhe është keq për ata që janë përgatitur për dasmat, por që është dashur të pajtohemi me këtë situatë”, ka deklaruar Sogojeva.

Qeveria në mbledhjen e së mërkurës ka marrë vendim për anulimin e dasmave dhe ahengjeve, si dhe mbylljen e klubeve të natës.