Me ndeshjen Vushtrria-Prishtina hapet xhiroja e 18-të e Superligës së Kosovës në hendboll në konkurrencë të meshkujve.

Kjo ndeshje zhvillohet sonte (e mërkurë) nga ora 20:00 në palestrën “Afrim Bunjaku” në Samadrexhë.

Është përballje e skuadrave të mesit të tabelës. Prishtina renditet e katërta me 17 pikë, ndërsa Vushtrria është e pesta me 10 pikë.

Derbi i xhiros mes Kastriotit e Rahovecit zhvillohet të enjten nga ora 18:30 në palestrën në Lipjan. Rahoveci është lider me 34 pikë. Ka fituar të gjitha 17 ndeshjet e deritashme. Kastrioti renditet i treti me 24 pikë, ndërsa e ka një ndeshje më pak të luajtur.

Nga ora 19:00 është takimi Trepça-Besa Famgas, ndërsa ndeshje tjetër e xhiros së 18-të është ajo mes Vjosës dhe Llapit.