Një superndeshje do të zhvillohet në Ligën e Kampionëve, sonte (e mërkurë). Barcelona e pret Bayern Munchenin.

Lidhur me këtë ndeshje ka folur Hansi Flick, trajneri i Barcelonës, i cili ka thënë se klubi gjerman luan mirë dhe ka lojtarë të jashtëzakonshëm.

“Shumë gjëra mund të ndodhin në ndeshje dhe gjërat mund të evoluojnë në një mënyrë që ne nuk e presim. Ne vetëm duhet të mendojmë për ndeshjen. Çdo ndeshje është e rëndësishme në këtë periudhë dhe ne duhet të ecim hap pas hapi. Bëhet fjalë për një kundërshtar që luan shumë mirë, me lojtarë të jashtëzakonshëm”, ka thënë Flick, i cili në të kaluarën e ka drejtuar me sukses Bayernin, derisa në këtë ndeshje synon të dalë fitimtar me klubin spanjoll: “Bayerni ishte i veçantë në jetën time. Është një klub i madh dhe kam shumë marrëdhënie të mira me lojtarë dhe trajnerë. Ishte një moment i bukur, por mbetet një kujtim. Dua të fitojmë”.

Barcelona në La Liga është duke shkëlqyer dhe renditet në vendin e parë, pasi ka regjistruar nëntë fitore dhe një humbje. Ndërsa në Ligën e Kampionëve, klubi spanjoll nga dy ndeshje ka regjistruar një fitore ndaj Young Boysit dhe një humbje nga Monaco.

Për këtë ndeshje ka folur edhe trajneri i Bayernit, Vicent Kompany, që ka thënë se radhën e ka Barcelona.

“Ne kemi fituar dhe kemi festuar pak përpara se të përballemi me Barcelonën. Jemi gjithmonë duke punuar në detaje për të vazhduar të përmirësohemi. Radhën tani e ka Barcelona. Do të bëjmë gjithçka për të fituar kundër ekipit të Hansi Flick”, ka thënë Kompany.
Bayern Munchen është në vendin e parë në Bundesliga. Në shtatë ndeshje regjistroi pesë fitore dhe dy barazime, derisa në Ligën e Kampionëve e mposhti bindshëm Dinamo Zagrebin e me pas humbi nga Aston Villa. Kjo ndeshje fillon në orën 21:00.

Të mërkurën takohen:
18:45 Atalanta – Celtic
18:45 Brest – Bayer Leverkusen
21:00 Atletico Madrid – Lille
21:00 Barcelona – Bayern Munchen
21:00 Benfica – Feyenoord
21:00 Manchester City – Sparta Prague
21:00 RB Leipzig – Liverpool
21:00 RB Salzburg – Dinamo Zagreb
21:00 Young Boys – Inter