Sot (e premte) do të zhvillohen ndeshjet e treta gjysmëfinale të “play-off”-it në FIVE STAR Superligën e Kosovës në basketboll.

Ndeshjet tashmë zhvendosen në Pejë dhe Therandë, ku do të zhvillohen edhe sfidat e katërta gjysmëfinale, derisa skuadra që shënon tri fitore kualifikohet në finalen e madhe. Përballje shumë interesante pritet ndërmjet Pejës dhe Ponte Prizrenit ashtu siç ishin edhe takimet e fundit. Ndeshjen e parë e fitoi Peja me shifrat 92:100, ndërsa takimin e fundit e fituan prizrenasit 112:111 pas vazhdimeve me një trepikësh nga Divine Myles në sekondat e fundit.

Takimet mes tyre ishin shumë interesante, duke dhuruar lojë të bukur dhe atraktive, e kështu pritet të premten mbrëma. 1:1 është seria edhe ndërmjet Golden Eagle Yllit dhe Rahovecit, duke e bërë shumë të paqartë se kush do të kualifikohet në finale. Dy sfidat e para u zhvilluan në Rahovec, kurse sfidat e dyta do të zhvillohen në Therandë.

Takimin e parë e fituan Vreshtarët 69:66, kurse të dytin therandasit 62:70. Në vitet e fundit përballjet në mes të këtyre dy skuadrave kanë qenë shumë interesante dhe kështu pritet të premten dhe të dielën.

Të premten takohen:
17:00 Peja – Ponte Prizreni (1:1)
20:15 Golden Eagle Ylli – Rahoveci (1:1)