Juristi nga Shqipëria, Kreshnik Spahiu, ka folur për deklaratat e presidentes së Kosovës, Vjosa Osmani, në drejtim të presidentit të Francës, Emmanuel Macron, lidhur me politikën e vizave për Kosovën.

Sipas Spahiut, pasojat e gjuhës së Osmanit ndaj Macronit do t’i vuajë populli i Kosovës.

“Ajo që ndodhi në Slloveni dhe deklarata e Macronit është një nga mesazhet më të rënda për Kosovën që nga krijimi i shtetit, se aktualisht Kosova është i vetmi shtet në botë nën sanksionet e ShBA-së dhe BE-së, vend që është i krijuar nga vetë Perëndimi dhe vetë ai e ka sanksionuar, jo për popullin por qeverinë. Të ishte në një shtet tjetër Osmani do rrezikonte pozicionin e saj. Shteti i Kosovës është krijesë e Perëndimit”.

“Osmani ka përdorur një terminologji që kreut të shtetit nuk i shkon, duke thënë dialogu mes Kosovës dhe Serbisë vdes. Është një lloj çmendurie, deklarata e Osmani, duke kërcënuar perëndimin se nëse nuk jep vizat për Kosovën, ne pezullojmë dialogu. Kosova nuk e ka luksin për t’i bërë karshillëk Parisit, Berlinit, Uashingtonit. Është një lloj vetëvrasjeje, jo për Vjosën, por dëmi që i sjell popullit të Kosovës. Nga hapat e gabuar që hedhin këta njerëz dëmtohet popull i Kosovës, rrezikohet izolimi përmes pezullimit të vizave”,  ka thënë Spahiu për “Euronews.al”.