Një tjetër kandidate për deputete e Partisë Socialiste (PS) është futur nën hetim nga SPAK-u.

Kjo për shkak se Gjykata e Posaçme ka marrë vendim duke urdhëruar Prokurorinë e Posaçme (SPAK) të regjistrojë procedimin penal ndaj ish-ministres së Mbrojtjes dhe deputetes Olta Xhaçka dhe bashkëshortit të saj, Artan Gaçi.

Ishte eurodeputeti Fredi Beleri që ka bërë kallëzim ndaj tyre në SPAK për çështjen e tjetërsimit të pronave në Himarë. Në momentin që SPAK-u ka mbyllur hetimet për ish-kryebashkiakun e Himarës, Jorgo Goro dhe bashkë me disa të tjerë e ka dërguar në gjyq, por kishte lënë mënjanë Xhaçkën dhe bashkëshortin i saj. Për shkak të kësaj, Beleri ka bërë një kallëzim të ri penal ku kërkonte shfuqizimin e vendimit të SPAK me të cilin njoftohej mosfillimi i procedimit penal “ndaj shtetasve të kallëzuar Olta Xhaçka dhe Artan Gaçi”.

Tashmë Gjykata, me një vendim të marrë që në datë 28 shkurt, të siguruar nga “lapsi.al”, ka urdhëruar SPAK-un regjistrimin e procedimit penal dhe vazhdimin e hetimeve për veprat penale “Shpërdorim i detyrës”, “Falsifikim i dokumenteve”, “Pastrim i produkteve të veprës penale” të kryera në bashkëpunim.

Bëhet fjalë për marrjen e një prone e cila sipas Belerit është tjetërsuar dhe më pas i është shitur Artan Gaçit, bashkëshortit të ish-ministres së Jashtme, Olta Xhaçka. Beleri ka akuzuar ish-kryebashkiakun e Himarës Jorgo, Goro, Artan Gaçin dhe ZRVPP Vlorë për falsifikimin që i dha 5512 metra katrorë tokë, familjes Foto Pavllo Mëhilli. Kjo pronë e cila është tokë truall, u regjistrua në ATMP si tokë bujqësore dhe më pas iu shit Artan Gaçit. Pas kallëzimit të ngritur SPAK ka vendosur nën sekuestro tokën në Dhërmi.