Me kërkesë të SPAK-ut, Gjykata e Posaçme në Shqipëri ka zgjatur me 3 muaj të tjerë hetimin ndaj ish-zv.kryeministrit Arben Ahmetaj për dosjen “Buka sha”.

Në këtë çështje Ahmetaj akuzohet për “shpërdorim të detyrës” gjatë privatizimit të ndërmarrjes “Buka sha”, duke i sjellë dëm në gati 7 mln euro buxhetit të shtetëror.

Në seancën e së mërkurës, ku pritet të vendosej për kalimin ose jo në gjykim të çështjes SPAK ka kërkuar kohë shtesë për hetimin, kërkesë që është pranuar edhe nga mbrojtja e Ahmetajt.

Seanca e radhës ndaj ish-zëvendëskryeministrit për këtë çështje është caktuar më 2 korrik 2025, shkruan “A2 CNN”.

SPAK-u ka mbyllur hetimet ndaj Ahmetajt në dhjetor 2024, por në seancën paraprake GjKKO ka kthyer dosjen në SPAK për plotësim të hetimit. Tre muajt shtesë të dhënë nga gjykata nuk kanë mjaftuar për SPAK, që ka vlerësuar nevojën e një shtyrjeje tjetër të afatit hetimor.