Qeveria e Spanjës po shqyrton rifillimin kombëtar të përdorimit të detyrueshëm të maskave mbrojtëse në spitale dhe objekte të tjera shëndetësore, ndërsa në Itali rastet e infeksioneve respiratore po shënojnë rekorde, pasi rastet e gripit dhe Covid-19 u përhapën në të gjithë Evropën.

Qendra Evropiane për Parandalimin dhe Kontrollin e Sëmundjeve (ECDC) rekomandon që evropianët të qëndrojnë në shtëpi nëse ndihen të sëmurë dhe të mendojnë seriozisht të mbajnë një maskë në vende të mbushura me njerëz ose objekte të kujdesit shëndetësor.

Gjithashtu këshillon qytetarët që të ndjekin udhëzimet kombëtare për vaksinimin e grupeve vulnerabël të popullsisë, duke nënvizuar se rastet e gripit përhapen më shpejt se ato të infeksioneve të tjera të frymëmarrjes, përfshirë SARS-CoV-2 që shkakton sëmundjen Covid-19.

Disa rajone në Spanjë e kanë bërë tashmë të detyrueshme që mjekët, infermierët, pacientët dhe vizitorët e spitalit të mbajnë maska. Qeveria po shqyrton vendosjen e masës në shkallë kombëtare, e cila është refuzuar nga disa autoritete rajonale shëndetësore, me një vendim përfundimtar që pritet të mërkurën.

“Diçka që ne e dimë se do të kufizojë epidemitë dhe do të mbrojë njerëzit e cenueshëm është maska”, tha Ministrja e Shëndetësisë e Spanjës, Monica García për televizionin shtetëror (TVE). “Është një masë e diktuar nga arsyeja, është e dokumentuar shkencërisht dhe e pranuar gjerësisht nga publiku”.

Spanja ishte një nga vendet e fundit në Evropë që hoqi përdorimin e detyrueshëm të maskave si pjesë e masave kundër pandemisë Covid-19. Përdorimi i maskave në transportin publik ishte i detyrueshëm deri në shkurt të vitit 2023, ndërsa në objektet shëndetësore dhe farmacitë deri në korrik.