Ai ka thënë se shoqëria kosovare, ai dhe familja e tij presin drejtësinë. Thaçi ka shtuar se para dy ditësh është njoftuar për aktakuzën e re.

Ish-drejtuesi politik i UÇK-së, ka thënë se e di që Kosova është në prag të zgjedhjeve të përgjithshme por shtoi se ai nuk paraqet “rrezik politik” për askënd.

“Me siguri ju e dini që unë tash e katër vite përballem me një proces tjetër gjyqësor dhe kemi dëgjuar vlerësime keqinterpretuese të historisë politike dhe kombëtare për lirinë e shtetit dhe pavarësinë e Kosovës më së paku nga viti 1980 deri më sot. Pra është një proces voluminoz. E di se shoqëria kosovare, familja ime dhe unë presim me padurim fundin e këtij procesi, e presim drejtësinë për çka edhe besojmë në drejtësi. Krejt papritmas para dy ditësh u njoftova për akuzën e re nga ZPS. E di se Kosova është në prag të zgjedhjeve të përgjithshme elektorale, por unë nuk jam pjesë e garës elektorale, nuk paraqes rrezik politik për askënd, prandaj kërkoj edhe sot, unë besoj dhe respektoj Kushtetutën dhe ligjet e Kosovës, kërkoj edhe sot nga të gjithë në këtë sallë që të respektohen Kushtetuta dhe ligjet e Kosovës, sepse Dhomat e Specializuara janë produkt i institucioneve të Republikës së Kosovës”, ka thënë ai.

Tutje, Thaçi nuk është deklaruar mbi akuzat e reja, por që pritet të deklarohet brenda afatit.

“Për shkak të angazhimeve tjera, unë nuk kam pasur mundësi që ta diskutojë në thelb dokumentin e konfirmuar nga ana juaj, prandaj do të deklarohem në kohë brenda afatit të rregullt kushtetues dhe ligjor”, është shprehur Thaçi.

Ndryshe, për Thaçin foli edhe avokatja e tij, Nina Tavakoli e cila tha se në “çështjen 06” ku Thaçi akuzohet për krime lufte, asnjëherë nuk e ka konsideruar atë si person që mund të arratiset. Madje, ajo tha se Thaçi ka hequr dorë nga posti i presidentit të Kosovës për të iu përgjigjur drejtësisë.

“Për shkak se klienti im është në fakt në paraburgim, në kuadër të lëndës 06, kështu që kjo i takon që është e panevojshme. Sidoqoftë do të doja të theksoja disa gjëra për procesverbal. E kuptoj që keni kryer një vlerësim të pavarur dhe ka arsye që Thaçi është person që arratiset, por doja të thoja për procesverbal që trupi gjykues në çështjen 06 nuk e kanë konsideruar asnjëherë si person që mund të arratiset. Ai është dorëzuar vullnetarisht në juridiksionin e kësaj gjykate dhe ka hequr dorë si president për të ardh këtu dhe kjo është theksuar në çështjen 06”, ka thënë Tavakoli.