Spitali i Përgjithshëm në Pejë do të nisë një epokë të re në ofrimin e shërbimeve laboratorike, duke digjitalizuar plotësisht Laboratorin Biokimik nga data 1 maj 2025.

Ky zhvillim sjell përmirësime të ndjeshme në saktësinë dhe efikasitetin e analizave laboratorike, duke ofruar një shërbim më cilësor dhe të avancuar për pacientët.

Për të siguruar zbatimin e suksesshëm të këtij sistemi, stafi i laboratorit ka përfunduar me sukses trajnimin e fundit, duke u përgatitur për të operuar me standardet më të larta, si çdo spital modern.

Ky proces pritet të lehtësojë dhe shpejtojë shërbimet laboratorike, duke reduktuar kohën e pritjes për pacientët dhe duke garantuar rezultate më të sakta dhe të besueshme.