Ideatori i shtatores së Skënderbeut në Prizren, Nue Oroshi është deklaruar rreth kritikave që janë bërë rreth shtatores së Skënderbeut , e cila është zbuluar në Prizren me rastin e festës së 28 Nëntorit.

Oroshi ka sqaruar gjithë ecurinë e punës për monumentin e Gjergj Kastrioti-Skënderbeut në Prizren.

“Fillimisht më vjen mirë që monumenti i parë i Gjergj Kastriotit-Skënderbeut në Prizren ka ngjallur debate të mëdha. Këtë e shikoj si normale sepse e kemi monumentin e parë të Gjergj Kastriotit-Skënderbeut në të gjitha trojet etnike shqiptare, jashtë vlerave të realizmit socialist. Kjo i ka tërbuar të gjithë ata historian të artit dhe skulptor të cilët nuk mundën që të dalin jashtë vlerave të realizmit socialist”, është thënë në reagimin e Oroshit.

Reagimi i plotë:

Sqarim për opinionin gjithëshqiptar lidhur me ecurinë e punës për monumentin e Gjergj Kastriotit-Skënderbeut në Prizren

Fillimisht më vjen mirë që monumenti i parë i Gjergj Kastriotit-Skënderbeut në Prizren ka ngjallur debate të mëdha.

Këtë e shikoj si normale sepse e kemi monumentin e parë të Gjergj Kastriotit-Skënderbeut në të gjitha trojet etnike shqiptare, jashtë vlerave të realizmit socialist.

Kjo i ka tërbuar të gjithë ata historian të artit dhe skulptor të cilët nuk mundën që të dalin jashtë vlerave të realizmit socialist.

Sa i përket porosisë së monumentit si historian i mesjetës, kur e kam bërë porosinë i kam sugjeruar autorit që ti ketë katër elemente që do ti cekë më poshtë:

1. Përkrenaren ku edhe e ka në kokë,
2. Aktin diplomatik apo volume mesjetare që e ka po ashtu në dorë,
3. Shqiponjën që e ka në gjoks dhe
4. Veshjen e një kalorësi mesjetar perëndimor që e kanë pasur mbretërit perëndimor në këtë periudhë kohore.

Të gjitha këto elemente i posedon monumenti i Gjergj Kastriotit-Skënderbeut në Prizren. Këto u thanë edhe në debatin që organizojë “Top Channel”.

Më këtë dëshiroj të theksoi se monumenti i Gjergj Kastriotit- Skënderbeut nuk ka fare të bëj me pamje otomane. Anën artistike ia kemi lënë autorit të punimit. Natyrisht edhe autori si skulptor e historian që është, ka lexuar shumë literaturë historike, gjë që mund të ketë lexuar edhe kronikat osmane që është krejt e natyrshme për një skulptor dhe historian.

Por ajo që po shoh nëpër debate është se kritikëve të artit si dhe skulptorëve me idetë e realizmit socialist në Tiranë dhe Prishtinë ju ka ikur zogu nga dora pa e parë fare. Problemi qëndron se me këtë skulpturën autentike të Gjergj Kastriotit -Skënderbeut në Prizren, janë thyer klishetë e komunizmit në aspektin e skulpturës.