Lulëzim ETEMAJ

8372 herë në qafë kur u ther Srebrenica
Asnjë fjalë s‘e nxori prej goje fjala
Iku me kokën ndër duar e më askush s‘e pa

Dikush tha u strehua në një çmendinë
Tjerët thanë është mbyllë me dry
Në ndonjë strehimore antibërthamore Brukseli
Ose në ndonjë faltore

Sytë gjithë përtesë po fërkonte Evropa
Dhe askush s‘kishte një përgjigje të vetme
Kishte përfunduar tashmë a po fillonte ëndrra

Në derë kur i trokitën Çirezi, Likoshani, Meja, Reçaku, Abria…
Në kulm po i luante valle flaka
Në prag të derës i kishte mbërritur gjaku
Dhurata që ia kishte nisur Kalamegdani

Mijëra mote do t‘i lë pas Srebrenica
Dhe prapë boshllëkun që e la atë ditë prapa
S‘do të mund ta mbushë fjala!