Rreth dy të tretat e popullsisë në Kosovë apo 1 milion e 74 mijë e 704 janë popullsi në moshë pune.

Agjencisë së Statistikave të Kosovës (ASK) njofton se shkalla e personave joaktiv në moshë pune vazhdon të mbetet mjaft e lartë, 57 për qind, transmeton KosovaPress, përcjell Periskopi.

Në raportin e publikuar për Rezultatet e Anketës së Fuqisë Punëtore për Tre Mujorin e Dytë të vitit 2024 (TM2 2024) nga ASK thuhet persona jo aktiv nga mosha 15 deri 64 vjeç, arrin 613 mijë e 29 qytetarë, krahasuar me periudhën e njëjtë të vitit 2023 sa ishin 700 mijë e 565.

Sfidë tjetër po ashtu sipas ASK-së është edhe një fakt tjetër, 78 mijë e 457 të rinj nuk janë as në shkollë, as në trajnime e as në punë.

Ndërkaq, të punësuar në këtë periudhë (TM2 2024) sipas ASK-së janë 412 mijë e 482, derisa në periudhën e njëjtë të vitit 2023 kanë qenë 420 mijë e 150.

“Rreth dy të tretat e popullsisë në Kosovë (1 074 704) janë popullsi në moshë pune (85 960 më pak sesa në periudhën e njëjtë të vitit paraprak). Persona aktivë ishin 461 mijë e 675 (8 862 më pak sesa në periudhën e njëjtë të vitit paraprak). Persona joaktivë ishin 613 mijë e 29 (87 536 më pak sesa në periudhën e njëjtë të vitit paraprak). Persona të punësuar ishin 412 mijë e 482 (7 mijë e 668 më pak sesa në periudhën e njëjtë të vitit paraprak). Persona të papunësuar ishin 49 194 (1 193 më pak sesa në periudhën e njëjtë të vitit paraprak)”, thuhet në raportin e publikuar për Rezultatet e Anketës së Fuqisë Punëtore për Tre Mujorin e Dytë të vitit 2024.

“Shkalla e jo-aktivitetit vazhdon të mbetet mjaft e lartë (57,0 %), mirëpo vërehet një rënie e përqindjes (-2,8%), krahasuar me periudhën e njëjtë të vitit paraprak”, thuhet më tej në raport.

Shkalla e jo-aktivitetit tek femrat ishte shumë e theksuar 75 %, krahasuar me meshkujt 39,1%.