Në konferencën për media së bashku me presidentin e Gjermanisë, Frank-Walter Steinmeier, presidenti i Shqipërisë,  Bajram Begaj është shprehur se propozimi franko-gjerman është i mirëpritur për dialogun Kosovë-Serbi.

Sipas tij, Procesi i Berlinit nga ana e qeverisë është marrë seriozisht dhe ka pranuar që vitin tjetër Samiti i Procesit të Berlinit të zhvillohet në Tiranë.

Kjo sipas tij tregon se qeveria shqiptare është e angazhuar dhe punon për gjetjen e rrugëve dhe marrëveshjeve të reja në këtë kohë.

“Është i mirëpritur propozimi franko-gjerman apo propozimi i Brukselit i quajtur së fundmi për dialogun Kosovë-Serbi. Çdo përpjekje për dialog dhe gjetjen e zgjidhjes mes Kosovës dhe Serbisë është i mirëpranuar nga ana jonë dhe kemi qenë gjithmonë për këtë dialog. Sa i përket procesit të Berlini, është shumë i rëndësishëm dhe firmosja e 3 marrëveshjeve për lëvizshmërinë krijoni premisa për marrëveshje të reja dhe në të ardhmen. Është e rëndësishme implementimi i këtyre marrëveshjeve domethënë që vendet të respektojnë marrëveshjet e firmosura dhe nuk është se unë mund të jap ndonjë këshill qeverisë në lidhje me ‘Ballkanin e hapur’ apo Procesin e Berlinit. Procesi i Berlinit nga ana e qeverisë është marrë seriozisht dhe ka pranuar që vitin tjetër Samiti i Procesit të Berlinit të zhvillohet në Tiranë. Kjo tregon që qeveria shqiptare është e angazhuar dhe punon për gjetjen e rrugëve dhe marrëveshjeve të reja në këtë kohë”.

“Po ashtu dhe për Ballkanin e Hapur  që është një proces integral dhe nëse do të jetë gjithëpërfshirës në të gjitha vendet e rajonit dhe do të ketë në fokus vetëm lëvizshmërinë, lirinë e lëvizjes dhe bashkëpunimin ekonomik është i mirëpranuar për faktin që Shqipëria  ka qenë pjesë e dialogut. Në këtë aspekt them se çdo bisedë, çdo bashkëpunim rajonal është i mirëpritur në interes të mirëqenies së njerëzve”,  ka thënë Begaj.

Ndërsa presidenti i Gjermanisë, Frank-Walter Steinmeier, ka lavdëruar punën e emisarit të BE-së, Mirosalv Lajçak në dialogun në mes të Kosovës dhe Serbisë.

“Nuk është dërguesi i  propozimeve i rëndësishëm. Çdo kontribut që sjell në uljen e përshkallëzimit të konflikteve është i mirëpritur përndryshe unë mund të them se kam shumë respekt për kolegun dhe mikun tim, Lajçak, i cili e ka shndërruar në një mision të tijin pasionant me përvojë, dije dhe durim të madh ka trajtuar pikërisht këtë proces të normalizimit të dialogut”, ka thënë presidenti gjerman. /tvklan