Gjatë vizitës në Gjeorgji, sekretari i përgjithshëm i NATO-s, Jens Stoltenberg, ka thënë se ky shtet do t’i bashkohet NATO-s, pavarësisht kundërshtimeve të fuqishme të Krmelinit.

Stoltenbergu ka takuar në Tbilisi zyrtarët gjeorgjianë dhe ka ndjekur një stërvitje ushtarake ndërmjet NATO-s dhe Gjeorgjisë.

Duke folur përkrah kryeministrit gjeorgjian, Mamuka Bakhtadze, ai ka thënë se 29 vendet anëtare të NATO-s “kanë deklaruar qartë se Gjeorgjia do të bëhet anëtare e NATO-s”.

“Do të vazhdojmë të punojmë së bashku për ta përgatitur anëtarësinë e Gjeorgjisë. Nuk pranojmë që Rusia ose ndonjë fuqi tjetër të vendosë”, ka thënë Stoltenbergu.

Bakhtadze, në anën tjetër, ka thënë se “anëtarësimi në NATO është zgjedhje e popullit gjeorgjian”.

Në samitin e vitit 2008 në Bukuresht, NATO-ja është pajtuar që Gjeorgjia të bëhet anëtare, por nuk ka caktuar ndonjë datë.

Në gusht të 2008-ës, Gjeorgjia dhe Rusia kanë bërë një luftë të shkurtër.

Pas luftimeve, Rusia ka lënë mijëra trupa në rajonet e shkëputura të Gjeorgjisë – Abkhazi dhe Oseti të Jugut, dhe i ka njohur ato si shtete të pavarura.