Qeveria e Suedisë ka vendosur të ekstradojë në Turqi një person të kërkuar për mashtrim, rasti i parë që kur Turqia kërkoi ekstradimin e një numri njerëzish në këmbim të lejimit të Stokholmit që të aplikonte zyrtarisht për anëtarësim në NATO.

Turqia, një anëtare e NATO-s, hoqi veton e saj mbi aplikimin e Finlandës dhe Suedisë për t’u bashkuar me aleancën në qershor pas javësh negociatash të tensionuara ku Ankaraja akuzoi dy vendet nordike se strehojnë, siç thotë ajo, militantë të Partisë së ndaluar të Punëtorëve të Kurdistanit (PKK).

Si pjesë e marrëveshjes, Turqia ka paraqitur një listë të njerëzve që donte që Suedia të ekstradonte, por që atëherë ka shprehur zhgënjimin për mungesën e përparimit. Burri, rreth të 30-tave, është rasti i parë i bërë publik i një ekstradimi në Turqi që nga arritja e marrëveshjes.

“Kjo është një çështje normale, rutinë. Personi në fjalë është një shtetas turk dhe i dënuar për vepra mashtrimi në Turqi në 2013 dhe 2016. Gjykata e Lartë e ka shqyrtuar çështjen si zakonisht dhe ka arritur në përfundimin se nuk ka pengesa për ekstradim”, ka thënë Morgan Johansson, ministri suedez i Drejtësisë për “Reuters”-in.

Një zëdhënës i Ministrisë së Drejtësisë nuk ka pranuar të thoshte nëse personi në fjalë ishte në listën e personave që Turqia kërkonte të ekstradonte, apo të jepte komente të mëtejshme mbi këtë çështje. /abcnews.al/