Zyrtarët afganë kanë njoftuar se nga një sulm vetëvrasës me bombë u vranë 63 persona dhe u plagosën 182 të tjerë. Shpërthimi ndodhi gjatë një dasme në Kabul, në orët e vona të 17 gushtit.

Presidenti afgan, Ashraf Ghani hodhi poshtë një deklaratë të grupit militant të talibanëve, të cilët mohuan përgjegjësinë për këtë sulm, duke thënë se ky grup të paktën ndan fajin për këtë sulm “barbar”.

Ai tha se ka thirrur një mbledhje të jashtëzakonshme për të diskutuar për çështjet e sigurisë dhe për mënyrat se si të shmangen “gabime” të tilla.

Talibanët mohuan përgjegjësinë për sulmin, i cili është njëri ndër më vdekjeprurësit në Kabul gjatë këtij viti dhe vjen në kohën kur Uashingtoni dhe talibanët raportohet se janë afër arritjes së një marrëveshjeje për t’i dhënë fund luftës gati 18-vjeçare.

“Talibanët nuk mund të shfajësojnë veten sepse ata ofrojnë platformë për terroristët”, ka shkruar në “Twitter” presidenti Ghani.

Ai ka deklarua se do të jetë afër familjeve të të vrarëve. “E dënoj fuqishëm sulmin çnjerëzor gjatë dasmës në Kabul. Prioriteti im kryesor tani është që të jem pran familjarëve të viktimave të këtij sulmi barbar. Në emër të kombit ju dërgoi ngushëllimet më të sinqerta familjarëve të atyre që u martirizuan”, ka deklaruar Ghani.

 Kurse, zëdhënësi i talibanëve, Zabihullah Muajahid e dënoi sulmin, ka raportuar  agjencia “DPA”.

Zëdhënësi i Ministrisë së Brendshme, Nasrat Rahimi tha se gra dhe fëmijë janë në mesin e të plagosurve pas shpërthimit të bombës.

“Rreth 1,200 persona ishin të ftuar në këtë dasmë”, tha Ahmad Omid, në i mbijetuar i këtij shpërthimi.

Shpërthimi ndodhi në një sallë dasmash në Kabul, që gjendet në një pjesë të banuar me komunitetin shiitë.