Superliga Evropiane nuk ka ndër mend të kursehet për të ngritur në këmbë një turne nga e para. Dhe duke parë shifrat që po investon, është e qartë që po bëhet gati për një turne me përmasa të jashtëzakonshme.

Gazetat sportive spanjolle kanë bërë me dije se kompania A22, e cila është ajo që po merret me organizmin e turneut, ka nisur ta përpilojë projektin e ri me tri liga, duke parashikuar edhe buxhetin që i duhet për edicionet e para të turneut. Dhe shifrat për të cilat flitet janë marramendëse.

Bëhet me dije se buxheti i caktuar për tri edicionet e para është 15 miliardë euro, që do të thotë se fitimet për pjesëmarrësit do të jenë kolosale në krahasim me çfarë shpërndan aktualisht UEFA. Për më tepër, planifikohet që një fond prej 400 milionë eurosh të kalohet te futbolli amator në Evropë dhe për ato kampionate që nuk përfaqësohen në këtë aktivitet. Fonde marramendëse, të cilat po mblidhen nga investitorë arabë dhe amerikanë dhe që po shqetësojnë UEFA-n, e cila për momentin nuk i garanton më shumë se 200 milionë euro në vit futbollit të atyre që nuk marrin pjesë në aktivitetet e saj dhe ka bërë të lindë frika se mund të humbasë shumë mbështetje. Dhe tashmë që miliardat pritet të vihen në lojë, shumë skuadra, si Interi për shembull në Itali, që ishte pjesë e projektit në fillim, por pas paktit me UEFA-n doli hapur se nuk do të ndërrojë krahë, mund ta rimendojë edhe njëherë vendimin.

Gjithsesi, si Interi janë edhe shumë klube të tjera që kanë thënë jo, sidomos ato angleze që i nevojiten pa dyshim këtij turniri për të pasur sukses të plotë, ndërsa në Serinë A ato që do të dëgjojnë drejtuesit e Superliga janë Napoli, Lazio, por edhe Milani dhe Juventusi.