Sonte në mbrëmje në Paris revista prestigjioze ‘France Football’ do të japë ‘Topin e Artë’ që ëndërron çdo futbollist dhe që në dekadën e fundit ka pasur vetëm 2 pronarë, Lionel Messin e Cristiano Ronaldon.

Bëhet fjalë për një prej objekteve më të çmuara në botën e futbollit, sepse ‘Topi i Artë’ është kthyer tashmë në vlerësimin maksimal për ço futbollist në aspektin individual. Pas 10 vitesh ku Messi e Ronaldo e kanë fituar nga 5 herë çmimin, sot do të ndryshojë gjithçka.

Çmimi, i krijuar në vitin 1956 nga revista franceze (Stanley Matthews ishte fituesi i parë), u shkri në vitin 2010 me ‘FIFA World Player’, marrëveshje që zgjati deri në 2015. Fillimisht ‘Topi i Artë’ jepej vetëm për futbollistët evropiane, ndërsa me kalimin e viteve rregullorja pësoi ndryshime dhe tashmë mund ta fitojë çdo futbollist, por me kushtin që të luajë në një klub evropian, raporton “Telesport”.

Sot në mbrëmje jepet edhe ‘Topi i Artë’ për femra, si dhe trofeu Kopa, për lojtarin më të mirë Under21.

FAVORITËT

Epoka Messi-Ronaldo merr fund sot dhe favoriti i madh për ta fituar çmimin është Luka Modriq, i cili ka fituar Ligën e Kampionëve këtë vit dhe shkëlqeu me Kroacinë në Kupën e Botës. Natyrisht, është një vit i çuditshëm, sepse asnjë futbollist nuk ka pasur një ecuri perfekte dhe ndoshta ka qenë votimi më i ndërlikuar prej shumë vitesh, edhe për faktin se sa vjen e shtohet presioni që çmimin ta fitojë dikush tjetër, pas 10 vitesh me dy aktorë.

Modriq fitoi ‘Topin e Artë’ të Botërorit, si dhe u nderua me çmimin ‘FIFA Best Men’s Player’ në një ceremoni në Londër në shtator, duke lënë pas Ronaldon dhe Salahun, ndaj zgjedhja e tij për ‘Topin e Artë’ duket logjike.

Franca, triumfuese në Botëror, ka Antoine Griezmann, Raphael Varane e Kylian Mbappe në listën e kandidatëve, të kuotuar menjëherë pas Modriq, por askush prej tyre nuk ishte mbi të tjerët te Franca, që ndoshta e meriton si ekip ‘Topin e Artë’.

Futbollisti i fundit që e fitoi çmimin para Messit e Ronaldos ishte braziliani Kaka, triumfues me Milanin në vitin 2007.

‘Topi i Artë’, tiparet, çmimi dhe pesha

‘Topi i Artë’ ka karakteristika të përcaktuara shumë qartë: 31 cm i lartë, 23 i gjerë dhe 23 i gjatë, si dhe peshon 7.2 kg. Vlera financiare është vendosur diku te 3.000 eurot. Edhe pse quhet ‘i artë’, realisht topi përpunohet dhe mbushet me një substancë të ngjashme me dyllin, ndërsa vetëm në fund lahet në ar, pasi i është vendosur edhe logoja e ‘France Football’, ndërsa në fund vendoset edhe emri i fituesit të trofeut.

Fituesit në të shkuarën

Ronaldo e Messi janë mbretërit e ‘Topit të Artë’, me nga 5 triumfe. Michel Platini, Johan Cruyff e Marco Van Basten e kanë fituar çmimin nga 3 herë, duke qenë legjendat e këtij çmimi deri sa nisi epoka Ronaldo-Messi.

Barcelona ka më shumë çmime ‘Ballon d’Or’, 11 të tillë, një më shumë se Real Madridi. Futbollistët nga Juventusi dhe Milani e kanë fituar trofeun nga 8 herë.

Lista e kandidatëve

Sergio Aguero (Man City), Gareth Bale (Real Madrid), Alisson Becker (Liverpool), Karim Benzema (Real Madrid), Edinson Cavani (PSG), Thibaut Courtois (Real Madrid), Cristiano Ronaldo (Juventus), Kevin De Bruyne (Man City), Roberto Firmino (Liverpool), Diego Godin (Atletico Madrid), Antoine Griezmann (Atletico Madrid), Eden Hazard (Chelsea), Isco (Real Madrid), Harry Kane (Tottenham), N’Golo Kante (Chelsea), Hugo Lloris (Tottenham), Mario Mandzukic (Juventus), Sadio Mane (Liverpool), Marcelo (Real Madrid), Kylian Mbappe (PSG), Lionel Messi (Barcelona), Luka Modric (Real Madrid), Neymar (PSG), Jan Oblak (Atletico Madrid), Paul Pogba (Manchester United), Ivan Rakitic (Barcelona), Sergio Ramos (Real Madrid), Mohamed Salah (Liverpool), Luis Suarez (Barcelona), Raphael Varane (Real Madrid).