Ambasadori i BE-së në Kosovë, Tomas Szunyog, ka folur të hënën në Forumin e Zhvillimit të Qëndrueshëm të organizuar nga Këshilli Evropian i Investitorëve.

Forumi mblodhi së bashku liderë nga biznesi, politika dhe financat për të diskutuar strategjitë për arritjen e ndryshimeve transformuese drejt një të ardhmeje më të gjelbër.

Ambasadori Szunyog shtjelloi planin e ri të rritjes për Ballkanin Perëndimor dhe rëndësinë e bashkëpunimit rajonal.

“Plani i ri i Rritjes për Ballkanin Perëndimor do t’i sjellë partnerët tanë, përfshirë Kosovën, më afër tregut të përbashkët të BE-së, do të nxisë rritjen ekonomike dhe do të përshpejtojë konvergjencën socio-ekonomike”, tha ambasadori Szunyog.

Ai theksoi se Kosova dhe partnerët e tjerë të Ballkanit Perëndimor mund të përfitojnë shumë nga ky plan, me kusht që të zbatojnë reformat e kërkuara.

Ndërsa theksoi se aksesi në tregun e vetëm të BE-së kalon përmes Tregut të Përbashkët Rajonal, ambasadori Szunyog bëri thirrje për heqjen e pengesave aktuale.

“Nëntë iniciativa të përgatitura plotësisht në nivel teknik janë të bllokuara në Komitetin e Përbashkët të CEFTA-s. Përzgjedhja e drejtorit të ri të CEFTA-s, e cila filloi mbi një vit më parë, po ecën shumë ngadalë. Përzgjedhja e Sekretarit të Përgjithshëm të Këshillit të Bashkëpunimit Rajonal ka ngecur për vite me radhë – procedura në vazhdim duhet të japë një rezultat të qartë. Të gjitha palët duhet të punojnë në mënyrë konstruktive dhe pragmatike për të arritur rezultate të dobishme reciproke”, tha ai.

Ambasadori gjithashtu vuri në dukje se që integrimi ekonomik rajonal të ketë sukses, Kosova duhet të punojë ngushtë me fqinjët e saj. “Në këtë drejtim, lëvizja e lirë e mallrave, shërbimeve dhe punëtorëve është një komponent kyç i Planit të Rritjes. Prandaj, inkurajoj Kosovën që të heqë ndalimin e mallrave serbe sa më shpejt të jetë e mundur”, përfundoi ambasadori Szunyog.

Instrumenti i Reformës dhe Rritjes për Ballkanin Perëndimor është shtylla financiare e Planit të Rritjes. Duke mbuluar periudhën nga 2024 deri në 2027, pritet të ofrojë deri në 2 miliardë euro grante dhe 4 miliardë euro kredi për gjashtë partnerët e BE-së në Ballkanin Perëndimor në vitet e ardhshme.