Në tryezën e organizuar nga Komisioni për Integrim Evropian në bashkëpunim me GIZ-in, me temën e diskutimit: “Rritja e integrimit rajonal: Roli i Kosovës në Procesin e Berlinit dhe në kryesimin e CEFTA-s”, shefi i Zyrës së Bashkimit Evropian në Kosovë, Tomas Szunyog, ka thënë se pengesat aktuale për rritjen e integrimit rajonal duhet të jenë të zgjidhura.

Szunyogu ka thënë se Kosova duhet të punojë bashkë me fqinjët e vet që të mund të shfrytëzojnë së bashku potencialin e rajonit.

Ndërsa kryetarja e Komisionit për Integrim Evropian, Rrezarta Krasniqi, ka thënë se Kosova është e fokusuar në zbatimin e reformave që jo vetëm të fitojë ekonomia, por të kontribuojë edhe në prosperitetin e rajonit.

Sipas saj, Procesi i Berlinit, është një mundësi e mirë për një zhvillim ekonomik. Ajo ka shtuar se Kosova është e përkushtuar te roli konstruktiv si në Procesin e Berlinit po ashtu edhe në marrëveshjen e CEFTA-s.