Shefi i Grupit Parlamentar të AAK-së, Besnik Tahiri, në konferencën e fundvitit ka thënë se 2023-a ishte vit i humbur për Kosovën.

Duke e rikapitulluar vitin 2023, ai ka theksuar rolin e AAK-së në këtë vit, por njëkohësisht edhe dështimet të cilat ndodhën gjatë këtij viti.

“Viti 2023 do të mbahet në mend si vit i cili e varfëroi secilin qytetar të Kosovës, pa dallim. Vit i cili e ngriti pasigurinë në vend, që nga aspekti social e deri tek ai i sigurisë. Ishte vit i eksperimentimit të shumicës së ministrave dhe dikasterëve që udhëheqin, duke e kthyer Kosovën ndër vendet e para në listë për rezultatin më të dobët në PISA, në vendin me pagat më të ulëta në sektorin publik në rajon, në mos shpenzimin respektivisht investimin e jo më shumë se një miliardë euro në projekte kapitale dhe me dështim të plotë në politiken e Jashtme dhe subjektivitetin e Kosovës”, ka thënë Tahiri.

Ai ka theksuar se vitit 2023 do të mbahet mend si vit kur qeveria është munduar me të gjithë mekanizmat e saj të kapë institucionet e pavarura, në veçanti gjyqësorin.

“Zhvillimi më i mirë dhe më i mrekullueshëm në 2024 do të ishte largimi i kësaj qeverie dhe ndalja e dëmit që i bëhet Kosovës”, ka thënë Tahiri.