Anëtari i Kryesisë së Lidhjes Demokratike te Kosovës (LDK), Xhafer Tahiri, ka folur për shqetësimet e kësaj partie duke përmendur  raportimet në mediat sllovene për një aferë, sipas tyre, milionëshe ku është përmendur emri i kryeministrit të vendit, Albin Kurti dhe i ambasadorit të Kosovës në Kroaci, Martin Berishaj.

Në një konferencë për media, Tahiri është shprehur se gazetat sllovene kanë botuar një hulumtim, ku sipas tij, hulumtohen lidhje e ambasadorit Martin Berishaj, me kompaninë sllovene GEN.

“Sipas gazetës, dyshohet se Martin Berishaj, është paguar nga GEN-i, teksa raportohet edhe për kompaninë e Berishajt që mban emrin ‘MB Consulting’ dhe ku aty madje theksohet se ambasadori kosovar ka tërhequr para të thata nga llogaritë bankare të kompanisë së tij mbi 600 mijë euro në vitin 2019-2020. Ky skandal sa vjen e po thellohet më tepër. Hulumtimi i fundit flet për 100 milionë euro, para të cilat janë menaxhuar nga kompania GEN e të cilat dyshohet se është financuar fushata edhe e kryeministrit Kurti, përmes filialit të GEN-it në Tiranë ku janë transferuar 14 milionë euro”, është shprehur Tahiri

Më tutje, ai ka theksuar se ndërlidhja me kryeministrin e Kosovës, Albin Kurti është pjesa më shqetësuese, teksa ka shtuar se kjo çështje duhet adresuar menjëherë.

“Prandaj, LDK-ja kërkon që këto dyshime shqetësuese që rëndojnë mbi imazhin e kryeministrit të Kosovës të adresohen menjëherë nga Qeveria Kurti se a janë të vërteta deklarimet e hulumtimet e gazetës sllovene. A janë përdorur paratë e GEN-it për të investuar në fushatën e kryeministrit Kurti dhe a përdoren këto para për të paguar njerëz që t’i përbaltin kundërshtarët politikë të kryeministrit Kurti në komente online, në media dhe në organizata të tjera”, ka theksuar Tahiri.