Shefi i Grupit Parlamentar të AAK-së, Besnik Tahiri, është duke qëndruar në Paris të Francës, ku Beatrice Fresko Rolfo nga Monako është zgjedhur raportuese e Komisionit të Këshillit të Evropës për Mundësi të Barabarta dhe mos-diskriminim.

Ai ka thënë se pas emërimit të Rolfo, Bakoyannis e Raportueses suedeze Rojha, është përmbyllur cikli i emërimit të raportuesve në KiE.

Tahiri ka thënë se gjatë këtij qëndrimi në Paris ka treguar për Kushtetutën e Kosovës, si një kushtetutë e avancuar për të drejta te njeriut, si dhe ka treguar përkushtimin e Kuvendit të Kosovës për t’u anëtarësuar në Këshill të Evropës.

Deputeti i AAK-së në diskutime me deputetë të vendeve të BE-së thotë se ka potencuar që për Kosovën s’ka rrugë tjetër përveç asaj të anëtarësimit në NATO, BE e KiE.

“Gjatë qëndrimit në Paris theksova se Kosova ka një Kushtetutë shumë të avancuar për të drejtat e njeriut, sikurse përkushtimi politik në Kuvendin e Republikës së Kosovës për t’u anëtarësuar në Këshill i tejkalon agjendat e brendshme politike. Po ashtu, në diskutime me deputetë të vendeve anëtare të BE-së, theksova se rruga drejt integrimit Euroatlantik në NATO, BE, e në institucione si Këshilli i Evropës është rrugë njëkahëshe për Kosovën”, ka shkruar Tahiri.