Ditën e sotme qarkulluan lajme në media se kryetari i Nisma-s, Fatmir Limaj, ka zhvilluar takim me Kryeministrin në detyrë të vendit, njëherësh kryetar i Lëvizjes Vetëvendosje, Albin Kurti.

Kështu u bë e ditur nga burime të Kanal10 të cilat theksuan se arsye e takimit ka qenë mundësia e krijimit të një koalicioni qeveritar.

Sipas burimeve mediale, qëllimi i takimit ka qenë diskutimi rreth mundësisë së krijimit të një koalicioni qeveritar, duke marrë parasysh se asnjë subjekt politik nuk ka arritur ta sigurojë shumicën për formimin e qeverisë së re.

Burimet tregojnë se Kurti ka shprehur gatishmërinë për bashkëpunim me tre deputetët e Nismës, në përpjekje për të siguruar numrin prej së paku 61 deputetësh në Kuvend.

Nga përpjekjet për të marrë një qëndrim zyrtar nga përfaqësuesit e Nismës dhe të Vetëvendosjes, nuk ka pasur përgjigje, përveç një reagimi të shkurtër nga Fatmir Matoshi, zyrtar i Nismës, i cili për “Gazeta Blic” i cili u përgjigj shkurt ‘jam jashtë Kosove’.

Ndërkohë, më 27 mars, Komisioni Qendror i Zgjedhjeve ka certifikuar rezultatet e zgjedhjeve të mbajtura më 9 shkurt. Vetëvendosje doli fituese me 42.30% të votave, duke siguruar 48 mandate. Pas saj renditen PDK me 24, LDK me 20 dhe koalicioni AAK-NISMA me gjithsej 8 deputetë.

Si rrjedhojë, asnjëra parti nuk mund të formojë e vetme qeverinë, duke krijuar kështu nevojën për koalicione të reja politike.

Fatmir Limaj, menjëherë pas zgjedhjeve, ishte ndër të parët që u shpreh i hapur për bashkëpunim, duke theksuar gatishmërinë për të marrë pjesë në tryezat politike që i shërbejnë interesit nacional.

“Kush të më fton në tavolinë, unë shkoj, ulna, për Kosovën. Pikë. Unë shkoj ulna për tema nacionale, s’është me rëndësi pozicionet… Çka po të vyen një qeveri jofunksionale, s’më ke mua në një qeveri jofunksionale kurrë, nuk hi. Një qeveri që është kundër interesave të Kosovës, nuk futem”, pati deklaruar Limaj në emisionin Debat Plus.

Në anën tjetër, Presidentja Vjosa Osmani ka caktuar datën 15 prill për seancën konstituive të legjislaturës së re të Kuvendit të Kosovës, duke i dhënë kështu një afat të qartë formimit të institucioneve të reja.

Kjo ka bërë që Lëvizja Vetëvendosje të nisë takimet me deputetët e partive jo-shumicë për të siguruar mbështetjen e nevojshme. Disa prej tyre e kanë konfirmuar përkrahjen për formimin e Qeverisë së re, ndërsa të tjerë kanë parashtruar kushte specifike.

Duda Balje dhe Veton Berisha janë ndër deputetët që nuk kanë dhënë ende mbështetjen e tyre të plotë, duke kërkuar që disa nga kërkesat e tyre të plotësohen paraprakisht. /GazetaBlic.