Së paku 11 policë janë vrarë nga një sulm i talibanëve në stacionin e tyre në provincën Balkh të Afganistanit.

Munir Ahmad Farhad, zëdhënës i guvernatorit të provincës, ka thënë se një grup prej më shumë se 400 talibanësh me motoçikleta e sulmuan stacionin në qarkun Shortepa.

“Njëmbëdhjetë oficerë të policisë u vranë në sulm. Talibanët gjithashtu kanë pësuar humbje të mëdha”, ka thënë Farhad.

Zëdhënësi i talibanëve, Zabihullah Mujahid, ka thënë se kryengritësit e kanë marrë nën kontroll rrethin, por Farhad e mohoi këtë pretendim.

Sulmet e talibanëve kanë vazhduar edhe gjatë fushatës së zgjedhjeve presidenciale në Afganistan, që janë mbajtur më 27 shtator.

Paqja atje duket e largët, sidomos që nga tërheqja, javë më parë, e Shteteve të Bashkuara nga një proces i bisedimeve me talibanët, qëllim kryesor i të cilave ka qenë nënshkrimi i armëpushimit.