Të apasionuarit e video-lojërave do të duhet të presin pak më shumë për një nga konsolat më të pritura të vitit 2025.

Nintendo sapo njoftoi se po ndalon porositjen paraprake të “Switch 2” në SHBA ndërsa përpiqet të përshtatet me tarifat e presidentit amerikan Donald Trump.

Kompania njoftoi më parë se do të nisë porositjen paraprake më 9 prill.

“Porositjet për Nintendo Switch 2 në SHBA nuk do të fillojnë më 9 Prill 2025 për të vlerësuar ndikimin e mundshëm të tarifave dhe kushteve në zhvillim të tregut”, tha Nintendo për DailyMail.

Kompania thotë se do të vazhdojë të ofrojë sistemin e lojërave për 449,99 dollarë.

Për të mbajtur konsolat me të njëjtin çmim dhe për të mos ia faturuar rritjen klientit, kompania do të duhet të “hajë” miliona dollarë në kosto të panjohura më parë.

Konsolat prodhohen kryesisht në Vietnam dhe Kinë. Të dyja vendet u goditën me tarifa “reciproke” nga administrata Trump.

Të gjitha produktet e prodhuara në Vietnam duhet të paguajnë një tarifë prej 46 për qind, ndërsa produktet nga Kina duhet të paguajnë 34 për qind shtesë.