Në qytetin e Betlehemit, i njohur si “kryeqyteti i Krishtlindjes”, atmosfera festive mungon këtë vit.

Rrugët janë të heshtura, pa dekorime dhe pa pemën e madhe të Krishtlindjes pranë Kishës së Lindjes, e cila besohet se ndodhet mbi vendin e lindjes së Jezusit.

Krishtlindjet po festohen vetëm me ceremoni fetare dhe mbledhje familjare, pasi festimet publike janë anuluar për të dytin vit radhazi për shkak të luftës në Gaza.

“Betlehemi është një qytet i trishtuar, në solidaritet me vëllezërit tanë në Gaza”, tha pastori lokal, Dr. Munther Isaac.

Në kishën e tij, skena e Lindjes paraqet Jezusin foshnje mbi rrënoja, simbol i vuajtjeve që po ndodhin në Gaza.

Nga ana tjetër, BBC raporton se ekonomia lokale është goditur rëndë, pasi turizmi si burimi kryesor i të ardhurave  është ndalur pothuajse plotësisht.

Familjet e krishtera dhe myslimane po përballen me pasiguri për të ardhmen, ndërsa shumë prej tyre janë detyruar të emigrojnë, transmeton Klankosova.tv.

Megjithatë, organizatat lokale si Klubi Lions i Palestinës po përpiqen të ndihmojnë me ndihma ushqimore dhe donacione për familjet në nevojë.

“Shpirti i Krishtlindjes është dhurimi dhe shpresa”, tha drejtuesi i grupit, Wael Shaer, duke shpërndarë pako ndihmash.

Në këtë kohë të vështirë, Betlehemi përpiqet të ruajë shpirtin e Krishtlindjes, duke shpërndarë ndihmë dhe duke uruar paqe për të gjithë.