Deputetja e Lidhjes Demokratike të Kosovës (LDK), Hykmete Bajrami, ka thënë se duhet të kthehet normaliteti i mësimit në shkolla fillore.

“Lehtësimi i parë, i domosdoshëm dhe i patejkalueshëm është vendimi për t’iu kthyer normalitetit të mësimit nëpër shkolla fillore, të mesme dhe eventualisht fakultete. Masat mbrojtëse duhet të vazhdojnë krahas rifillimit normal të mësimit nëpër të gjitha shkollat e Kosovës”, ka shkruar Bajrami në llogarinë e vet në “Facebook”.

Ajo ka thënë se në të dhënat e publikuara, del se 227 shkolla fillore dhe të mesme punojnë me skenarin e mësimit të shkurtuar.

“Ndërsa, 539 shkolla tjera po punojnë me skenarin e kthimit të plotë të nxënësve në bankat shkollore. Sikurse po punojnë me kapacitete të plota edhe të gjitha çerdhet në gjithë Kosovën. Prandaj, është momenti i fundit që mësimi të kthehet në normalitet në të gjitha shkollat. Njëkohësisht të rritet edhe mbikëqyrja e masave si dezinfektimi dhe ajrosja sa më e shpeshtë e ambienteve shkollore. Mësimi i kombinuar – një pjesë e nxënësve në klasë e pjesa tjetër në shtëpi është i dështuar. Pra, shkollat s’kanë kushte, s’kanë përgatitje teknike dhe as trajnime të mësimdhënësve për një mësim të tillë”, ka thënë ish ministrja e Arsimit.

Ajo ka shtuar se institucionet shtetërore duhet të vendosin sa më shpejtë të normalizojnë procesin mësimor në të gjitha nivelet përfshirë edhe universitetet.

“Krahas lehtësimit të masave për shkollat dhe universitetet duhet të ndahen edhe fonde shtesë. Këto fonde duhet të përdoren ekskluzivisht për të përballuar kthimin e nxënësve në objektet shkollore. Me këtë mënyrë të organizimit të mësimit përpos fëmijëve po pësojnë edhe prindërit si në aspektin e kohës ashtu edhe në aspektin financiar. Pra, është vështirësuar edhe më shumë jeta e familjeve tona. Qeveria duhet të mendojë pikërisht për lehtësimin e jetës së fëmijëve dhe rrjedhimisht edhe të familjeve që kanë fëmijë në procesin mësimor”, ka thënë Bajrami.