Sulmet ushtarake izraelite vranë të paktën 40 palestinezë gjatë natës dhe të premten në Rripin e Gazës, shumë prej tyre në kampin e refugjatëve Nuseirat në qendër të Gazws, thanë mjekët, pasi tanket izraelite u tërhoqën nga pjesë të kampit.

Mjekët thanë se kishin gjetur 19 trupa palestinezësh të vrarë në zonat veriore të Nuseirat, një nga tetë kampet e refugjatëve të enklavës.

Më vonë të premten, një sulm ajror izraelit vrau të paktën 10 palestinezë në një shtëpi në Beit Lahiya në Rripin verior të Gazës, thanë mjekët.

Të tjerë u vranë në zonat veriore dhe jugore të Rripit të Gazës, shtuan mjekët. Nuk kishte asnjë deklaratë të re nga ushtria izraelite të premten, por të enjten ajo tha se forcat e saj po vazhdonin “të godasin objektivat terroriste si pjesë e aktivitetit operacional në Rripin e Gazës”.

Tanket izraelite kishin hyrë në zonat veriore dhe perëndimore të Nuseirat të enjten. Ata u tërhoqën nga zonat veriore të premten, por mbetën aktivë në pjesët perëndimore të kampit. Shërbimi i Emergjencave Civile Palestineze tha se ekipet nuk ishin në gjendje t’i përgjigjeshin thirrjeve të ankthit nga banorët e bllokuar në shtëpitë e tyre.

Dhjetra palestinezë u kthyen të premten në zonat ku ushtria ishte tërhequr për të kontrolluar dëmet në shtëpitë e tyre, shkruan Reuters.