Ministria e Shëndetësisë (MSh) ka apeluar tek të gjithë qytetarët që këto ditë të kenë kujdes të shtuar nga temperaturat e larta.

Sipas MSh-së dhe Institutit Kombëtar të Shëndetësisë Publike (IKShPK), të moshuarit dhe ata me sëmundje kronike sugjerohen që të shmangin diellin nga ora 10:00 deri në 17:00.

Po ashtu, është rekomanduar që të gjithë qytetarët të pinë ujë dhe të shmangin pijet me sheqer, alkool dhe kafeinë e po ashtu edhe të vishen me veshje të lehta.

“Mos i lini fëmijët apo kafshët në makina. Mbani shtëpinë tuaj të freskët. Qëndroni në hije”, janë disa prej rekomandimeve nga Ministria e Shëndetësisë dhe IKShPK-ja.

Gjatë ditës, sipas Institutit Hidrometeorologjik të Kosovës, në vend është paraparë që të mbajnë temperatura deri në 37 gradë celsius.