Presidenti i Kosovës, Hashim Thaçi ka deklaruar çështja e të pagjeturve është turpi i bashkësisë ndërkombëtare.

Në Ditën Ndërkombëtare të të Zhdukurve, shefi i shtetit ka akuzuar edhe Serbinë qw po e politizon zbardhjen e fatit të 1647 qytetarëve.

Në profilin e tij në “Facebook”, ai ka shkruar se bashkësia ndërkombëtare duhet t’i shfrytëzojë të gjitha mjetet që ka në dispozicion për t’i bërë presion Serbisë për ta zbardhur fatin e të pagjeturve.

Postimi i plotë i presidentit:

Në Ditën Ndërkombëtare të të Zhdukurve kujtojmë 1647 qytetarët tanë të pagjetur. Çështja e të pagjeturve është turpi i bashkësisë ndërkombëtare dhe është për keqardhje që Serbia po e politizon edhe zbardhjen e fatit të tyre.

Bashkësia ndërkombëtare duhet t’i shfrytëzojë të gjitha mjetet që ka në dispozicion për t’i bërë presion Serbisë dhe për ta zbardhur fatin e të pagjeturve dhe çdo krim të kryer në Kosovë.

Nuk do të ndalemi asnjëherë së kërkuari që të zbardhet fati i tyre. Nuk do të ndalemi asnjëherë së kërkuari drejtësi për çdo viktimë, për çdo të zhdukur, për çdo familje.