Presidenti i Kosovës, Hashim Thaçi, mbrëmë ka marrë pjesë në pritjen e organizuar nga Ambasada e Republikës së Kosovës në Washington, për ndër të dhjetëvjetorit të pavarësisë së Kosovës.

Në këtë mbrëmje ishin të ftuar shumë përfaqësues të shtetit amerikanë, personalitete të jetës politike dhe kulturore.

Derisa ka shprehur falënderimin ambasadores Çitaku për organizimin e kësaj ngjarjeje, shefi i shtetit, ka falënderuar edhe të pranishmit e tjerë, që siç ka thënë ai janë këtu për të festuar një ditë shumë të veçantë për njerëzit e Kosovës.

Para shumë diplomatëve, presidenti Thaçi ka kujtuar ditën e shpalljes së Pavarësisë së Kosovës, duke e përshkruar si emocionuese, njofton Klan Kosova.

“Unë u bëra kryeministër disa muaj më parë dhe nuk flija gjithë natën, sepse po përgatitesha ta lexoja Deklaratën e Pavarësisë së Republikës së Kosovës. Isha gati të deklaroja atdheun tim si të lirë, demokratik dhe të pavarur. Ajo ditë nuk ishte një ditë e zakonshme”, ka theksuar ai.

Presidenti ka thënë se si kurrë më parë, njerëzit në të gjithë vendin dhe shumë të tjerë që vinin nga e gjithë bota, mbushën rrugët dhe sheshet e ngushta të qytetit, duke shtuar tutje se shumica e tyre ishin të lumtur për kapitullin e ri dhe fillimin e ri, por shumë ishin të trishtuar, duke kujtuar sakrificën që dhamë për pavarësinë.

Sipas tij, mijëra njerëz vdiqën, dhjetëra mijëra gra që ishin përdhunuar, njerëz të panumërt humbën gjithçka për lirinë dhe pavarësinë tonë.

“Duke shkuar në ndërtesën e Kuvendit, po mendoja gjithashtu për babanë dhe nënën time, dhe shumë gjenerata të tjera që kishin jetuar nën aparteid, pa shkollim në gjuhën e tyre, pa tri elementet të cilat amerikanët i kishin cilësuar si më të rëndësishmet në Deklaratën Amerikane të Pavarësisë: lirinë, jetën dhe lumturinë”.

Duke e cilësuar këtë moment si më të lumturin dhe më të rëndësishmin në jetën e tij, kreu i vendit tha, “Ishte momenti më i lumtur dhe më i rëndësishëm i jetës sime. Ishte momenti më i lumtur për popullin tim dhe ishte një moment i veçantë për të gjithë miqtë e Kosovës. Ishte një udhëtim i vështirë dhe i gjatë”, ka deklaruar Thaçi.

I pari i vendi, ka kujtuar ushtarët amerikanë që dhanë jetën për lirinë dhe pavarësinë e Kosovës, si dhe për paqen në Ballkan, miqtë e Kosovës këtu në Amerikë, të cilët besuan në ne.
Sipas tij, ata ofruan dritë në errësirë dhe ata ofruan ngushëllim në kohë trishtimi.

“Njerëz si kongresmeni Engel, senatori Dole, kongresmeni Lantos – shumë e shumë të tjerë që besuan në ne. Kur erdhi puna tek Kosova nuk kishte rëndësi nëse ishit demokrat apo republikan, dhe – jam i lumtur të shoh – që nuk ka rëndësi as tani” ka vlerësuar ai.

Presidenti Thaçi ka deklaruar se Kosova është i vetmi vend ku bulevardi i presidentit Klinton kryqëzohet me bulevardin e presidentit Bush, duke shprehur po kështu edhe falënderimin për diasporën.
Kreu i vendit, ndër tjera ka thënë se kurrë nuk do ta harrojmë natyrën e drejtë të luftës, qëllimin e pastër të luftës dhe rezultatin e bekuar të përpjekjeve tona.

“Unë jam i bindur tani, më shumë se sa isha i bindur kur lexova Deklaratën e Pavarësisë dhjetë vjet më parë – se e ardhmja e Kosovës dhe e ardhmja e miqësisë sonë me Amerikën është e sigurt”, vijoi presidenti.

Duke shtuar tutje se Kosova do të mbetet një partner i besuar i bashkësisë ndërkombëtare, dhe në veçanti të Shteteve të Bashkuara.

“Kosova është një vend me popullsinë më të re në Evropë dhe synimi jonë për t’u bërë anëtar i BE-së, NATO-s dhe OKB-së do të arrihen. Bota është një vend më i mirë sot për shkak të Pavarësisë së Kosovës dhjetë vjet më parë”, ka përfunduar presidenti Thaçi.