Presidenti i Republikës së Kosovës, Hashim Thaçi, ka pritur të martën ministrin e Mbrojtjes të Italisë, Lorenzo Guerini, të cilin e ka falënderuar për rolin e Italisë në KFOR dhe në forcimin e paqes në përgjithësi në Kosovë dhe në rajon.

“Jemi mirënjohës për kontributin e Italisë në KFOR dhe për përpjekjet e gjithanshme për të forcuar paqen në Kosovë”, është shprehur presidenti Thaçi.

Duke folur për KFOR-in dhe komandantët italianë të forcës paqeruajtëse, presidenti Thaçi është shprehur se “kam pasur bashkëpunim të shkëlqyer me gjeneralmajorin D’Addario dhe mirëpres mundësinë për të vazhduar këtë bashkëpunim me Gjeneralmajorin Risi”.

Presidenti Thaçi ka shprehur kënaqësinë që FSK-ja, në bashkëpunim me NATO-n, është bërë forcë profesionale, shumetnike, që i ka hapur perspektivë anëtarësimit të Kosovës në NATO në një të ardhme të afërt.

Ndërsa ministri Guerini është i shprehur i lumtur që Italia ka kontribuar për forcimin e paqes në Kosovë dhe në tërë rajonin e Ballkanit.

/Epoka e re/