![](https://www.epokaere.com/wp-content/uploads/2020/07/112324789_4064342943636034_3464029026053409510_o.jpg)
Thaçi: Krenar që kam vënë gurthemelin e Katedrales dhe Xhamisë në Prishtinë
Presidenti i Kosovës, Hashim Thaçi, ka përkrahur ndërtimin e xhamisë së re në Prishtinë.
Në profilin e tij në “Facebook”, ai ka shkruar se ndihet krenar që ka vënë gurthemelin e Katedrales dhe Xhamisë në Prishtinë.
Duke komentuar protestën e sotme kundër ndërtimin e xhamisë se re, ai ka shkruar protesta janë vlera demokratike, por ato asnjëherë nuk duhet të shërbejnë për nxitjen e urrejtjes ndërfetare dhe ndëretnike.
Postimi i plotë i Thaçit:
Ndjehem mirë dhe krenar, që së bashku me kreun e komunitetit të besimtarëve të krishterë dhe me Presidentin Rugova kemi vënë gurthemelin e Katedrales në Prishtinë. Po ashtu, ndjehem mirë dhe krenar, që së bashku me kreun e komunitetit të besimtarëve myslimanë dhe me Presidenten Jahjaga e vumë edhe gurthemelin e Xhamisë në Prishtinë.
Kosova është shembulli më i mirë, jo vetëm në rajon, por edhe më gjerë për tolerancën dhe bashkëjetesën e shkëlqyer ndërfetare, shekuj me radhë.
Askush nuk ka asnjë arsye që të ndjehet i fyer, i anashkaluar apo i privilegjuar mbi baza fetare në shtetin tonë modern.
Protesta dhe shprehja e pakënaqësisë janë vlera demokratike në shoqërinë tonë, por ato asnjëherë nuk duhet të shërbejnë për nxitjen e urrejtjes ndërfetare dhe ndëretnike.
Zoti e bekoftë Kosovën dhe popullin e saj! HTH
(M.K / Epoka e re)