Qeveria e Kosovës ka nënshkruar një deklaratë me Ministrinë Federale për Bashkëpunim Ekonomik dhe Zhvillim të Gjermanisë, për shfrytëzimin e mëtejmë të kampit në Prizren si park inovativ dhe trajnues kosovaro-gjerman (ITP).

Nënshkrimi i kësaj deklarate është bërë nga kryeministri i Republikës së Kosovës dhe ambasadori i Gjermanisë në Kosovë, Christian Heldt.

Deklarata e përbashkët paraqet bazën për vazhdimin e raporteve kosovaro-gjermane pas tërheqjes së KFOR-it gjerman nga kampi në Prizren dhe për prioritizimin e pesë fushave në kuadër të kampit të planifikuar: Inovacioni (teknologjia dhe ndërmarrësia); aftësimi profesional, si dhe edukimi formal dhe jo-formal; shkenca dhe hulumtimi; bujqësia, si dhe turizmi dhe kultura. Qëllimi është që nëpërmjet sinergjive të edukimit dhe aftësimit profesional, shkencës dhe ndërmarrësisë të jepet kontribut për zhvillimin ekonomik dhe social në komunën e Prizrenit, në gjithë Kosovën dhe në pikëpamje perspektive edhe në rajon.

Me ketë deklaratë nënvizon angazhimin e Qeverisë Gjermane që në vazhdimësi të jap një kontribut të rëndësishëm për zhvillimin e Kosovës dhe të mbështes atë edhe më tutje në rrugën e saj drejtë strukturave euroatlantike.

Me këtë rast kryeministri, Ramush Haradinaj, ka thënë se nënshkrimi i kësaj deklarate është një porosi e mirë e prosperitetit dhe  zhvillimit ekonomik.

Ai ka treguar se janë disa fusha të rëndësishme që do të ketë ndikim parku në zhvillimin e vendit dhe sipas tij, është një ndërmarrje e përbashkët Kosovë-Gjermani.

Haradinaj ka bërë me dije se institucionet e Kosovës do të jenë të vendosura që të zbatojnë këtë projekt të përbashkët.

“Tani flamuri i Gjermanisë që ka valuar në bazën ushtarake do ta ketë një mision tjetër, atë të prosperitetit të Kosovës, të bashkëpunimit të ndërsjellë në të gjitha fushat, veçanërisht në atë ekonomike dhe ky është një lajm i mirë, dhe i falënderoj për besim institucionet e Qeverisë së Gjermanisë dhe njëkohësisht iu shpreh përkushtimin dhe vendosmërinë tonë, që këtij projekti të përbashkët t’i japim përkrahjen e pa rezervë”, ka thënë Haradinaj.

Kurse ambasadori i Gjermanisë, Christian Heldt, ka thënë se është shumë i lumtur që flamuri gjerman edhe më tutje do të valojë në Prizren.

Ai ka thënë se flamuri i Kosovës dhe ai i Gjermanisë do të qëndrojnë së bashku si premtim për një ardhmëri të suksesshme ekonomike të Kosovës.

“Jam shumë i lumtur që flamuri gjerman do të valëvitet edhe në të ardhmen në Prizren. Ai në të ardhmen nuk do të jetë më një shenjë e pranisë së Bundeswehr-it. Në vend të kësaj, bashkë me flamurin kosovar ai do të qëndrojë si premtim për një ardhmëri të suksesshme ekonomike të Kosovës. Për mua personalisht është shumë e rëndësishme që parku i ri inovativ dhe trajnues gjermano-kosovar të ju mundëson kosovarëve të rinj të ndërtojnë një të ardhme në shtetin e tyre të ri”, është shprehur Heldt.

Deklarata e nënshkruar sot është një hap i rëndësishëm drejtë krijimit të vendeve të reja të punës, për shfrytëzimin e potencialit Kosovar të inovacionit, si dhe për mbështetjen e iniciativave kulturore dhe sociale.

Iniciativa është një projekt i rëndësishëm i bashkëpunimit të dy qeverive dhe në anën kosovare përkrahet drejtpërdrejt nga kryeministri Ramush Haradinaj. Deklarata nga sot hyn në fuqi dhe hap rrugën për hapat e mëtejmë operacional.