Nënkryetari i PDK-së dhe kryetari i Degës në Prizren, Shaqir Totaj, ka reaguar pas vdekjes së 26-vjecarit nga Gjilani, duke thënë se një ngjarje e tillë është turp për institucionet shtetërore.

Totaj ka thënë se sa ishte në pushtet Vetëvendosje e kishte shfrytëzuar çdo tragjedi.

Ai ka përmendur vdekjen tragjike të një vajze të mitur në Prizren në vitin 2016-të,  kur LV-ja dhe shoqëria civile kishte organizuar protesta.

“Në vitin 2016, në Prizren, një vajzë e mitur kishte gjetur vdekjen nga shembja e një muri të një shtëpi të vjetër në zonën historike të qytetit. Megjithëse ajo pjesë e murit ishte e rrethuar me pengesa, kjo nuk pengoi të ngritën i madh dhe i vogël në Vetëvendosje për përgjegjësi të komunës dhe dorëheqje të kryetarit të atëhershëm. Pas VV-së, organizata të shoqërisë civile e analistë organizuan protesta për dorëheqjen. Kërkoheshin koka për këtë tragjedi”, ka shkruar ai.

Postimi i plotë i Totajt:

E dhimbshme dhe tronditëse vdekja e të riut 26-vjeçar nga Gjilani derisa mbahej me vendim të shtetit në karantinë. Një ngjarje e rëndë për familjen por një turp për institucionet që mbyllën sytë dhe u bën të shurdhër ndaj situatës së tij.

Asnjëherë nuk kam qenë për t’i politizuar rastet tragjike, nga kushdo qoftë dhe për asnjë arsye. Por, e kaluara na tregon diçka tjetër. Dhe për ironi, në pushtet është Lëvizja Vetëvendosje e cila dikur fatkeqësisht u ngrit mbi dhunën dhe shfrytëzoi çdo tragjedi. Ajo e përqafoi një politikë nekrofilike.

Në vitin 2016, në Prizren, një vajzë e mitur kishte gjetur vdekjen nga shembja e një muri të një shtëpi të vjetër në zonën historike të qytetit. Megjithëse ajo pjesë e murit ishte e rrethuar me pengesa, kjo nuk pengoi të ngriten i madh dhe i vogël në Vetëvendosje për përgjegjësi të komunës dhe dorëheqje të kryetarit të atëhershëm. Pas VV-së, organizata të shoqërisë civile e analistë organizuan protesta për dorëheqjen. Kërkoheshin koka për këtë tragjedi!

Dhe ku jemi sot? Të njëjtit njerëz që u ngritën mbi dhunën dhe politikën nekrofilike po kërkojnë të heshtim. Po kërkojnë të mos politizohet. Por edhe nëse ne do të heshtim – nuk duhet të hesht drejtësia. Ajo duhet të vihet në vend. Nuk do të hesht babai dhe familja e të riut që nuk jeton më!. (M.A /Epoka e re).