Kryetari i Komunës së Prizrenit, Shaqir Totaj, ka pritur në takim ndërmarrësin shqiptar të suksesshëm në Gjermani, Isak Neziri.

Totaj ka treguar se Neziri po bën përpjekje për sjelljen e investimeve ndërkombëtare në Kosovë, respektivisht në Komunën e Prizrenit, që janë të rëndësishme për zhvillimin ekonomik jo vetëm për Prizrenin, por, për gjithë rajonin.

“Krijimi i mundësive të reja për punësim dhe avancim të infrastrukturës, si dhe bashkëpunimi me ndërmarrës të suksesshëm nga mërgata shqiptare e ata të huaj mund të sjellë një model të ri të zhvillimit, i cili do të ndihmonte në ngritjen e cilësisë së jetës dhe standardit të qytetarëve tanë”, ka thënë Totaj.