Tre anëtarë të një familje kanë vdekur gjatë ditës së djeshme në Shqipëri, më konkretisht në Gjirin e Lalzit, ndërsa sipas raportimeve të para, shkaktar mendohet të jetë helmimi nga kërpudhat

Por, përveç kësaj, i çuditshëm është fakti që ka ngordhur edhe qeni i cili familjarët thonë se nuk ka ngrënë kërpudha.

“Familja ka shkuar në shtëpi të vetë. Ajo është shtëpia jonë, babi është me dokumente edhe shtetas i Shqipërisë. Ata janë infektuar prej disa ushqimeve që i kanë ngrënë. Diçka që është shqetësuese për neve dhe e papërballueshme është neglizhenca e mjekëve. Tre pacientë me shkuar me të njëjtin simptomë dhe me t’u kthyer në shtëpi me barna, nuk është adekuate. Pra pa analiza pa kurrfarë përkushtimi me e liruar pacientin në atë gjendje është diçka jo e duhur për çdo mjek. Ndërsa është e dyshimtë se edhe qeni ka ngordhur, ndërsa ai nuk ka konsumuar kërpudha, ai i ka ngrënë ushqimet e veta ndërsa është e dyshimtë se si ka ndodhur kjo”, ka treguar djali i viktimave.

Djali i çiftit ka treguar për medie se me të kuptuar që gjendja e familjarëve të tyre nuk ka qenë e mirë, ai ka shkuar në Shqipëri.

Megjithatë, ai ka deklaruar se mjeku në spitalin e Tiranës i kishte thënë se tashmë është vonë.

Sipas tij, mjekët kanë neglizhuar rastin e familjarëve të tij, kështu edhe duke i trajtuar me vonesë.

Ai ka thënë se intervenimi i familjarëve të tyre dhe i atyre që e kanë njohur babanë tij ka qenë shumë i shpejtë pas vdekjes së viktimave.

Ndërsa, ka treguar se varrimi i familjarëve të tyre do të bëhet sot në orën 16:30 në varrezat e qytetit të Gjilanit.