Arminia Bielefeld vuri jo pak në vështirësi Bayern Munchen mbrëmjen e djeshme në “Allianz Arena”, teksa kaloi edhe në avantazh të dyfishtë, por në fund i detyrua të largohej me vetëm një pikë të fituar, pasi ndeshja përfundoi në barazim 3-3.

Tekniku i kampionëve të Gjermanisë, Hansi Flick vlerësoi kundërshtarin për lojën e bërë dhe theksoi se skuadra e tij ishte e lodhur nga udhëtimet e gjata dhe kalendari i ngjeshur, gjë që u reflektua edhe në fushën e lojës.

Megjithatë për trajnerin “bavarez” edhe barazimi ndaj vendit të 16 në renditje ka një aspekt pozitiv dhe ai është pikërisht reagimi i skuadrës në pjesën e dytë të ndeshjes, ku ndonëse në disavantazh të dy golave, besoi deri në fund dhe ia doli të shmangë humbjen.

“Arminia Bielefeld tregoi se mund të luajë futboll dhe kjo më pëlqeu shumë. U detyruam të bëjmë disa ndryshime në formacion për shkak të mungesave, por ndikoi jo pak edhe lodhja, pasi kohët e fundit jemi përballur me kalendar të ngjeshur dhe udhëtime të gjata. Gjithsesi më pëlqeu jashtë mase besimi i skuadrës se mund t’ia dilte edhe kur ishte në disavantazh të dy golave. Reaguam mjaft mirë në pjesën e dytë dhe mund të them se kjo na jep shijen e fitores edhe pse morëm vetëm një pikë”, ka thënë Flick.

Me barazimin e marrë ndaj Arminia Bielefeld, Bayerni shkoi në kuotën e 49 pikëve në krye të renditjes, i ndjekur nga Leipzig me 44 pikë, teksa edhe këtë sezon “bavarezët” janë favoritët kryesorë për të triumfuar në Bundesligë.