Trajneri i Juves: Fiorentina nuk e meritoi humbjen
Skuadra e Juventusit ka marrë një fitore shumë të rëndësishme në udhëtim te Fiorentina në kuadër të ndeshjes së parë gjysmëfinale në Coppa Italia. Fituesin e vulosi autogoli në minutën e fundit nga Venutti.
Trajneri i Juventusit, Massimiliano Allegri është shprehur i kënaqur me këtë fitore.
“Ne i dinim vështirësitë që na prisnin në Firence dhe për të luajtur këtë ndeshje. Ndeshja ishte e ekuilibruar dhe kishim situata në të cilat nuk përfunduam pasimin e fundit, por djemtë ishin të mirë dhe sinqerisht kjo ndeshje ishte e vështirë, rrezikuam në fushë të hapur, por luajtëm me qetësi. Rezultati 1-0 për ne është një rezultat i mirë që na bën të lumtur”, ka thënë Allegri, i cili me pas e lavdëroi paraqitjen e Fiorentinës.
“Jo, nuk më befasoi aspak Fiorentina. Ne e dimë që ata luajnë përpara dhe që kanë aftësi të shkëlqyera teknike. Italiano po bën një punë të shkëlqyer, ai është shumë i mirë. Gjë e mirë që e kemi rezultatin në anën tonë, por Fiorentina sigurisht që nuk e meritonte të humbiste”, ka shtuar Allegri.