Trajneri i Kombëtares së Moldavisë, Serghei Clescenco lidhur më ndeshjen ndaj Kombëtares së Shqipërisë, e cila zhvillohet të premten ka thënë se moldavët do të japin gjithçka në fushë për të mos i zhgënjyer tifozët.

“Ne realisht duam ta shohim stadiumin plotë. Ende e mbaj mend ndeshjen e vitit 1998 kundër Gjermanisë. Tifozët qëndronin në këmbë, pasi stolat ishin mbushur. Ata brohoritnin pa pushim. Ne humbëm 1-3, por në 20 minutat e para kryesuam 1-0. Lojtarëve u them që pavarësisht rezultatit, ne nuk mund t’i zhgënjejmë tifozët tanë në aspektin e lojës. Jemi të motivuar për të dhënë gjithçka në fushë kundër Shqipërisë. Duam t’i bëjmë këto momente historike të paharrueshme për të gjithë Moldavinë”, ka thënë Clescenco.