Gentrit Kadrolli

Te një pjesë e konsiderueshme e bizneseve shohim investimin e vazhdueshëm që bëjnë në faktorin njeri falë trajtimit dhe shërbimit që u bëjnë klientëve të tyre, por e njëjta gjë nuk ndodh te pjesa tjetër e tyre, sepse trajtimi dhe shërbimi i tyre lë shumë për të dëshiruar.

Shpeshherë ndodh kur klientët hyjnë në ambientet e bizneseve për herë të parë për t’u interesuar për produkte, sado që hapësira të jetë e madhe brenda atyre ambienteve dhe sado i mbushur apo i rregulluar të jetë ambienti brenda, ndodh që klientët shumë shpejt të përfundojnë jashtë.

Mundësitë që klientët të kthehen prapë dhe të hyjnë në atë biznes apo thënë ndryshe të na japin rastin e dytë për bashkëpunim, janë të vogla.

Pyetja që duhet t’i bëjmë vetës pas kësaj është – pse ndodh kjo?

Janë një varg arsyesh pse klientët mund të veprojnë në këtë mënyrë. Njëra prej arsyeve mund të jetë komfori termik, arsye tjetër mund të jetë shkaku i mënyrës së renditjes së produkteve, e shumë arsye të tjera. Mirëpo, arsyeja më madhore ka të bëjë me qasjen e raportit me klientin, respektivisht fytyra e parë të cilën klientët e shohin brenda një ambienti biznesor.

 Pse ndodh kjo?

Klienti në momentin që hy brenda nuk ka se kush t’i urojë mirëseardhje, klientin nuk ka kush ta pyet se çfarë ndihme i duhet, do të thotë mungon gatishmëria për të ndihmuar. Ndodh kjo për shkak të mosdhënies së alternativave të ngjashme, ndodh kjo sepse klientin nuk ka se kush ta orientojë se cili sektor në cilin drejtim është, ndodh kjo kur klientit nuk ka se kush t’i tregojë se ku gjendet dhoma e provës nëse kemi të bëjmë me biznes të veshmbathjeve, ndodh kjo sepse edhe në qoftë se ndonjëri nga stafi është shfaqur për të na ndihmuar, qëndron aq afër nesh sa që nëse jemi në shoqëri të ndonjë miku apo familjari me të cilin kemi dalë për të bërë blerje apo thjeshtë për t’u interesuar rreth ndonjë produkti, e kemi të pamundur të diskutojmë rreth produktit, ngase të shkaktohet jorehati për shkak të afërsisë dhe përcjelljes hap pas hapi.

Nëse të gjitha këto dhe shumë gjëra të tjera do të bëheshin në një mënyrë tjetër ku klienti me të hyrë brenda në ambient duhet t’i urohet mirëseardhje dhe të pyetet se çfarë mund t’i ndihmojmë, të shfaqim interesim për të kuptuar nevojat e tij, të largohemi në një distancë të mjaftueshme duke i bërë të qartë klientit se nëse ka nevojë për ndihmë atëherë ne jemi këtu dhe krejt në fund t’i falënderojmë që na vizituan edhe nëse nuk bën blerje. Kështu klienti do ta ndiente veten më të respektuar dhe më të vlefshëm.

Dëgjimi dhe kuptimi, ajo çfarë klientët duan

 Të qenit dëgjues i mirë na ndihmon në shumë aspekte, siç mund të na ndihmoj të kemi një familje me të bashkuar, t’i shmangemi konflikteve dhe keqkuptimeve, të mirëkuptohemi me kolegët në punë dhe në fund të qenit dëgjues i mirë na ndihmon shumë në ndërtimin e besimit në raport me  klientin.

Por çfarë saktësisht nënkuptojmë me dëgjues të mirë kur kemi përballë një klient. Nëse pyesim njeri-tjetrin se sa jemi dëgjues të mirë, shumë prej nesh themi që jemi dëgjues të mirë. Do të thotë kemi durimin të dëgjojmë tjetrin derisa të përfundojë atë se çfarë ka për të thënë. Nga përvoja e gjatë me njerëzit në përgjithësi, kam parë që janë dy karakteristika me të theksuara kur e dëgjojmë personin që kemi përballë: heshtim derisa tjetri të përfundojë dhe në një mënyrë ne i lëmë të kuptojnë nëpërmjet qëndrimit të trupit tonë, lëvizjeve tona të kokës, syve apo edhe frymëmarrjes që jemi duke përcjell rreth asaj se çfarë janë duke thënë.

Nga studime të shumta që bëhen rreth asaj se deri në çfarë niveli shkon ky dëgjues i mirë, rezultatet inkorporojnë elemente shtesë, gjë që na tregon se vetëm dy elementet e lartcekura nuk mjaftojnë, por që  kombinimi i tyre me elemente të tjera siç janë parashtrimi i pyetjeve rreth asaj se çfarë jeni duke dëgjuar, nëse jemi duke e prezantuar një produkt, ndërhyrje duke parashtruar pyetje rreth mënyrës së pagesës, përsëritjes së ndonjë elementi të produktit apo pyetje rreth transportit, si dhe pyetje të tilla si këto nuk e pengojnë atë që flet por janë shenja lajmëruese për shitësin që jemi duke e dëgjuar me vëmendje dhe jemi me të vërtet të interesuar dhe shumë të fokusuar në atë çka po dëgjojmë.

Gjithashtu, fokusimi që biseda të merr kahe më miqësore dhe jo të veprohet gjithnjë me ballafaqim argumentesh dhe kundërargumentesh është element shtesë i një dëgjuesi dhe kuptuesi të mirë. Pikërisht ndërhyrjet e tilla me pyetje dhe qasje të ngrohtë e bënë që ta dallosh dëgjuesin më të mirë nga një dëgjues të themi mesatar. Me këtë gjithashtu plotësohet ajo çfarë klienti synon. Të dëgjohet mirë dhe të kuptohet mirë dhe jo të kuptohet dhe të dëgjohet sa për të përgatitur përgjigje, sepse nëse veprohet në këtë mënyrë gjithçka mund të mbetet gjysmake në raport me të.