Kjo e martë shënoi ditën e finaleve të “play-off”-it Nacional për grupmoshat U13, U15 dhe U17, ku skuadrat Trepça’89 (U13), 2 Korriku (U15) dhe Drita (U17) dolën fituese.

Në finalen e grupmoshës U13, Trepça’89 arriti të mposhtë ekipin e Ramiz Sadikut, me rezultat 1:0. Golin e vetëm të kësaj ndeshjeje e shënoi Alban Hetemi në minutën e 13-të, duke i siguruar trofeun skuadrës së tij.

Në kategorinë U15, ekipi kryeqytetas 2 Korriku triumfoi kundër Pejës, me të njëjtin rezultat, 1:0. Golin vendimtar për skuadrën prishtinase e realizoi Orges Paçarizi, në minutën e 50-të. Finalja e grupmoshës U17 mes Dritës dhe Malishevës ofroi një dramë futbolli, duke u mbyllur me rezultat 3:2 në favor të Dritës, me një gol në fund të takimit. Goli i parë ishte një autogol nga Haki Zogaj në minutën e 30-të. Për Dritën shënuan edhe Altin Destani në minutën e 66-të dhe Jorik Kryeziu në minutat shtesë të ndeshjes. Për Malishevën, golat u shënuan nga Artiol Mazreku në minutën e 26-të dhe Fazli Thaçi në minutën e 75-të.

Garat e “play-off”-it në kategorinë U17 përcaktuan edhe tri skuadrat që do të jenë pjesë e Superligës U17 për sezonin e ardhshëm. Përveç Dritës si kampione e ‘play-off’-it, biletën për në Superligë e siguruan edhe Malisheva dhe QS Prishtina.