Ministrja e Ekonomisë, Artane Rizvanolli, ka treguar tri kërkesat e saj karshi operatoreve energjetikë, gjegjësisht Operatorit të Sistemit, Transmisionit dhe Tregut (KOSTT) dhe Kompanisë Kosovare për Distribuim të Energjisë Elektrike (KEDS.

Pas takimit të përbashkët, Rizvanolli ka thënë se ka kërkuar që ekipet në terren të sanojnë lokacionet ku ka probleme, puna në ndërtimin e nënstacioneve të vazhdojë intensivisht, si dhe komunikim sa më të mirë me qytetarët.

“Për gjatë takimit, unë i përcolla të gjitha ankesat e qytetarëve që i kemi pasur për furnizimin me energji elektrike, veçanërisht në zonat më të ndikuara. Nga njëra anë, kërkova nga operatorët që të bëjnë maksimumin që ekipet në terren të sanojnë të gjitha lokacionet ku ka probleme, qoftë për shkak të prishjeve apo ngarkesës”.

“Nga ana tjetër, është tepër me rëndësi që investimet në nivel të transmisionit që janë duke u bërë e që janë afër, si nënstacioni i Ferizajit, që është rajoni që ka më së shumti problem, të vazhdojnë punimet me intensitet. Siç u informova, pritet që ky nënstacion të përfundojë brenda disa ditësh ose javësh”.

“Kisha edhe një kërkesë tjetër, që të kenë komunikim sa më të shpeshtë dhe të qartë me qytetarët”, ka thënë ajo. /EO