Gazeta e njohur gjermane “Bild” ka raportuar të mërkurën se Italia është duke u përgatitur për tërheqjen e mundshme të trupave amerikane nga Kosova.

Sipas gazetës së njohur gjermane, ky raportim mbështetet në informacionet që ka.

“Sipas të dhënave të ‘Bild’-it, Italia është duke u përgatitur për tërheqje të mundshme të trupave të ShBA-së nga Kosova. Aleatët evropianë atëherë do të ishin të vetëm në Ballkan kundër mikut të Putinit, Aleksandër Vuçiq, dhe ushtrisë së tij të fuqishme serbe”, është thënë në artikullin e “Bild”-it.

Më tutje në këtë artikull është thënë se ka një shqetësim të madh në shumë pjesë të Evropës për negociatat amerikano-ruse.

“Presidenti amerikan, Donald Trump, e ka përjashtuar një tërheqje të plotë të trupave amerikane nga Evropa. Sipas të dhënave të Bild-it, shërbimet perëndimore të sigurisë dhe politikanët perëndimorë kanë frikë se bisedimet që nisën në Riad do të mund të çonin në përfundimin e pranisë së trupave amerikane në pjesë të mëdha të Evropës”.

Këto burime, “Bild” i ka mbështetur duke cituar edhe një zyrtar të sigurisë në Evropën Lindore.

“Sipas të dhënave tona, kjo ka të bëjë me kërkesat e Putinit të vitit 2021, që janë tërheqja e trupave amerikane nga të gjitha shtetet e NATO-s që janë bërë pjesë e aleancës pas vitit 1990”.