Presidenti i Shteteve të Bashkuara të Amerikës (ShBA), Donald Trump, ka kritikuar mediet amerikane, duke thënë se ai “e dënon me forcë urrejtjen dhe fanatizmin”, porse kjo nuk raportohet.

Duke folur në një tubim në Florida, përpara zgjedhjeve për Kongres më 6 nëntor, ai tha se një e treta e amerikanëve besojnë se media “është armik i popullit”.

Presidenti nuk ka dhënë prova për këtë.

Kritikët e akuzojnë Trumpin për nxitje të dhunës duke përdorur retorikë ekstreme kundër kundërshtarëve, medieve, emigrantëve dhe myslimanëve, raporton “Rel”.

Këtë javë, Trumpi ka ofruar ngushëllime për 11 të vrarët nga të shtënat masive në një sinagogë, në qytetin Pitsburg të Pensilvanisë.

Shtëpia e Bardhë e hodhi poshtë fajin për sulmin në tempullin Pema e Jetës që ndodhi në fundjavë.