Ish-presidenti i Shteteve të Bashkuara të Amerikës (ShBA), Donald Trump, e ka lëshuar një deklaratë lidhur me vizitën e të dërguarit të tij, Richard Grenell në Kosovë.

Trumpi ka thënë se populli i Kosovës dhe ai i Serbisë kanë kapërcyer pengesa të mëdha në ndjekje të normalizimit ekonomik.

Presidenti i 45-të i ShBA-së ka thënë se marrëveshjet e ndërmjetësuar nga administrata e tij janë historike dhe nuk duhet të braktisen.

“Populli i mrekullueshëm i Serbisë dhe Kosovës kanë kapërcyer pengesa të mëdha në ndjekje të normalizimit të tyre ekonomik. Marrëveshjet e ndërmjetësuara nga administrata ime janë historike dhe nuk duhet të braktisen, shumë jetë janë në pikëpyetje. Rajoni është shumë i rëndësishëm dhe njerëzit kanë pritur shumë gjatë që kjo punë të lihet mënjanë”, është thënë në deklaratën e Trumpit, e cila është publikuar nga drejtori për komunikim, Taylor Budowich.

Sipas kësaj deklarate,  Donald Trump ka thënë se Richard Grenell e ka vizituar kufirin Kosovë – Serbi pikërisht për ta theksuar marrëveshjen e arritur në Shtëpinë e Bardhë.

Ai ka thënë se normalizimi mes të dy vendeve është i mundur, por sipas tij kjo kërkon përpjekje të sinqertë.

“Sot, i dërguari im ambasadori Rich Grenell vizitoi kufirin Kosovë-Serbi për të theksuar këtë marrëveshje të rëndësishme. Ashtu siç dëshmuam në Lindjen e Mesme me marrëveshjet e Abrahamit, paqja dhe normalizimi ekonomik është i mundur, por kërkon një përpjekje të sinqertë dhe udhëheqje të palëkundur. Paqja është e mundshme, mos u dorëzo – prosperiteti afatgjatë për këto dy kombe është në pikëpyetje!”, ka thënë Trumpi.

45: The great people of Serbia and Kosovo have overcome tremendous obstacles in their pursuit of economic normalization. The agreements my administration brokered are historic and should not be abandoned, many lives are at stake. pic.twitter.com/BIs3lI5jjf

— Taylor Budowich (@TayFromCA) November 11, 2021